Gweld a all eich plentyn gael hawl barhaol i fyw yn y DU

Dod ag aelodau o’r teulu o Wcráin i’r DU

Mae rheolau arbennig ar gyfer aelodau o’r teulu sy’n wladolion Wcráin. Darllenwch y rheolau ynghylch dod ag aelodau o’r teulu o Wcráin i’r DU.

Efallai y gallwch wneud cais i'ch plentyn fyw'n barhaol yn y DU - gelwir hyn yn 'ganiatâd amhenodol'. Dim ond os yw eich plentyn o dan 18 oed y gallwch wneud cais - oni bai ei fod eisoes yn y DU ar fisa plentyn.

Os byddwch chi'n gwneud cais i'ch plentyn gael caniatâd amhenodol, fe'ch gelwir yn 'noddwr' iddo. Bydd yn costio dros £2,500 i gael caniatâd amhenodol ar gyfer eich plentyn.

Bydd angen i chi wirio:

• a allwch chi noddi eich plentyn

• a all eich plentyn wneud cais am ganiatâd amhenodol

• y rheolau ynghylch eich incwm a'ch cynilion

• bod lle rydych chi’n byw yn ddiogel ac yn addas

Gweld a allwch chi noddi eich plentyn

Gallwch noddi eich plentyn i wneud cais am ganiatâd amhenodol:

• os oes gennych chi a rhiant arall eich plentyn hawl barhaol i fyw yn y DU - rhaid i'r ddau ohonoch fod yn y DU neu'n symud i'r DU gyda'ch plentyn

• os oes gennych chi gyfrifoldeb llwyr dros eich plentyn ac mae gennych hawl barhaol i fyw yn y DU

Chi sy’n llwyr gyfrifol os chi yw’r unig un sy’n gyfrifol am fagwraeth a lles eich plentyn. Mae hyn fel arfer yn golygu nad yw rhiant arall eich plentyn yn rhan o'i fywyd.

Mae gennych hawl barhaol i fyw yn y DU os oes gennych un o’r canlynol:

• Dinasyddiaeth Brydeinig

• Dinasyddiaeth Wyddelig - rhaid i chi fod yn byw neu wedi byw yn y DU

• caniatâd amhenodol i aros neu hawl preswylio

• statws preswylydd sefydlog o’r Cynllun Preswylio’n Sefydlog i Ddinasyddion yr UE

Os ydych chi'n gwneud cais am ganiatâd amhenodol, gallwch wneud cais am eich plentyn ar yr un pryd. Bydd y Swyddfa Gartref yn gwneud penderfyniad am eich cais cyn gwneud penderfyniad am gais eich plentyn.

Os ydych chi’n ffoadur neu os oes gennych ddiogelwch dyngarol

Gall eich plentyn wneud cais i ymuno â chi o dan reolau 'aduno teulu' ffoaduriaid os cafodd ei genhedlu neu ei fabwysiadu cyn i chi orfod gadael eich gwlad. Mae'n rhad ac am ddim ac yn haws gwneud cais, a does dim angen i chi gael caniatâd amhenodol.

Edrychwch ar GOV.UK i weld sut gall eich plentyn wneud cais am aduniad teuluol.

Gweld a all eich plentyn wneud cais am ganiatâd amhenodol

Os yw eich plentyn y tu allan i'r DU, rhaid iddo fod o dan 18 oed i wneud cais am gyfnod amhenodol.

Os yw eich plentyn eisoes yn y DU, dim ond os oes ganddo fisa plentyn y gall wneud cais am ganiatâd amhenodol. Mae’n dal yn gallu gwneud cais os yw dros 18 oed. Efallai ei fod wedi cael fisa plentyn os oedd gan ei riant un o’r canlynol:

• fisa partner

• fisa fel rhiant plentyn yn y DU - bydd hwn yn blentyn gwahanol

Enghraifft

Mae Toshiya yn ddinesydd Japaneaidd a oedd yn byw yn Japan. Toshiya sy’n llwyr gyfrifol am ei ferch, Hana. Mae Hana hefyd yn ddinesydd o Japan.

Pan oedd Hana yn 14 oed, priododd Toshiya â dinesydd Prydeinig, Anita. Symudodd Anita yn ôl i’r DU a chafodd Toshiya fisa partner i symud gyda hi. Arhosodd Hana yn Japan i barhau â’i haddysg.

Pan ddaeth Hana â’i haddysg i ben yn 16 oed, cafodd fisa plentyn i ddod i’r DU. Gallai wneud hyn oherwydd bod gan Toshiya fisa partner.

Mae Toshiya bellach wedi cael caniatâd amhenodol. Mae Hana yn 19 oed.

Gall Hana wneud cais am ganiatâd amhenodol oherwydd mai Toshiya sy’n llwyr gyfrifol amdani ac mae ganddo statws mewnfudo sy’n gadael iddo fod yn noddwr. Gall wneud cais er ei bod yn y DU ac yn hŷn na 18 oed oherwydd bod ganddi fisa plentyn.

Os yw eich plentyn yn y DU ac yn hŷn na 18 oed, fel arfer bydd angen iddo basio prawf ‘Bywyd yn y DU’ a phrawf Saesneg cyn gwneud cais. Gallwch:

• edrychwch ar y rheolau ynghylch profion Bywyd yn y DU ar GOV.UK

• edrychwch ar y rheolau ynghylch profion Saesneg ar GOV.UK

• dod o hyd i ddarparwr prawf Saesneg ar GOV.UK

Os nad yw eich plentyn wedi pasio'r profion, gall wneud cais am amser ychwanegol i fyw yn y DU - gelwir hyn yn 'ganiatâd cyfyngedig'. Dylai ei gwneud yn glir ei fod yn gwneud cais am ganiatâd cyfyngedig - bydd y cais yn costio llai. Unwaith y bydd eich plentyn wedi pasio'r profion, gall wneud cais am ganiatâd amhenodol ar unwaith.

Os yw eich plentyn yn annibynnol

Chewch chi ddim noddi eich plentyn os yw’n annibynnol, er enghraifft:

• os yw'n byw gyda phartner

• os yw wedi gadael cartref - oni bai ei fod wedi gadael ei gartref i astudio

Os nad nhw yw eich plentyn yn un biolegol neu fabwysiedig

Gallwch noddi'r plentyn os yw ei riant wedi marw a chithau'n ŵr, yn wraig neu'n bartner sifil i'r rhiant.

Efallai y byddwch hefyd yn gallu noddi'r plentyn os yw'r canlynol yn berthnasol:

• rydych chi'n perthyn iddo

• mae rhesymau difrifol pam y dylid caniatáu iddo ddod i'r DU - er enghraifft am nad oes neb arall a allai ofalu amdano yn unman arall

Gofynnwch am help gan gynghorydd arbenigol os ydych chi am noddi plentyn pan nad ydych chi'n rhiant nac yn llys-riant iddo.

Os ydych chi am fabwysiadu plentyn o dramor, mae rheolau gwahanol - gofynnwch am help gan gynghorydd arbenigol.

Darllenwch y rheolau ynghylch eich incwm a'ch cynilion

Os ydych chi neu'ch partner yn gwneud cais am ganiatâd amhenodol ar yr un pryd

Bydd angen i chi basio prawf gwahanol o’r enw ‘gofyniad ariannol’. Darllenwch y rheolau ynghylch gwneud cais am ganiatâd amhenodol i oedolion.

Rhaid i chi ddangos y bydd gennych ddigon o incwm bob wythnos i ofalu am eich plentyn. Gelwir hyn yn brawf ‘cynnal a chadw digonol’.

I weld a allwch chi basio'r prawf cynnal a chadw digonol, rhaid i chi gyfrifo'n gyntaf faint o incwm y mae'r llywodraeth yn dweud bod ei angen arnoch bob wythnos. Yna bydd angen i chi wirio a oes gennych ddigon o incwm.

Cyfrifwch faint o incwm sydd ei angen arnoch bob wythnos

I gyfrifo faint o incwm y mae'r llywodraeth yn dweud bod ei angen arnoch bob wythnos, adiwch y canlynol at ei gilydd:

• £77 os ydych chi'n sengl neu £121.05 os ydych chi'n byw gyda phartner

• £70.80 ar gyfer pob plentyn dan 18 oed a fydd yn byw gyda chi – mae hyn yn cynnwys y plentyn yn gwneud cais am ganiatâd amhenodol ac unrhyw blentyn arall a fydd yn byw gyda chi

• eich costau tai - eich taliadau rhent neu forgais ynghyd â'ch treth gyngor yw'r rhain

Pan fyddwch yn cyfrifo eich costau tai, peidiwch â chynnwys unrhyw ran o'r costau a fydd yn cael eu talu gan y Gostyngiad yn y Dreth Gyngor, y Budd-dal Tai neu elfen dai'r Credyd Cynhwysol.

Enghraifft

Mae plentyn Alisha yn gwneud cais am ganiatâd amhenodol o’r tu allan i’r DU. Alisha sy’n llwyr gyfrifol am ei phlentyn ac nid oes ganddi bartner.

Cyfanswm yr incwm wythnosol sydd ei angen ar Alisha i noddi ei phlentyn yw £77 ynghyd â £70.80 ynghyd â’i chostau tai.

Mae rhent Alisha yn dod o dan elfen dai’r Credyd Cynhwysol. Mae hyn yn golygu mai’r dreth gyngor yw ei hunig gost tai.

Mae treth gyngor Alisha yn £30 bob wythnos. Mae hi’n cael Gostyngiad o £10 yn y Dreth Gyngor bob wythnos. £30 llai £10 ydy £20. Mae hyn yn golygu bod angen £20 o incwm arni ar gyfer y dreth gyngor bob wythnos.

Cyfanswm yr incwm sydd ei angen ar Alisha bob wythnos yw £77 a £70.80 yn ogystal ag £20. Mae hyn yn £167.80.

Gweld a oes gennych chi ddigon o incwm

Cyfrifwch faint o incwm y byddwch yn ei gael bob wythnos ar ôl tynnu treth. Os ydych yn byw gyda phartner, gallwch ychwanegu ei incwm at eich incwm chi. Gallwch gynnwys enillion, pensiynau ac incwm o bethau fel rhent neu gyfranddaliadau.

Os oes gennych unrhyw gynilion, gallwch eu hychwanegu at eich incwm - rhaid i chi fod wedi cael y cynilion am o leiaf 6 mis. Rhannwch swm eich cynilion gyda 52 - dyma faint y gallwch ei ychwanegu at eich incwm wythnosol.

Os yw cyfanswm eich incwm yn ddigon uchel, byddwch yn bodloni’r prawf cynnal a chadw digonol.

Enghraifft

Mae plentyn Alisha yn gwneud cais am ganiatâd amhenodol o’r tu allan i’r DU. Alisha sy’n llwyr gyfrifol am ei phlentyn ac nid oes ganddi bartner. Cyfanswm yr incwm wythnosol sydd ei angen arni i noddi ei phlentyn yw £167.80.

Enillion wythnosol Alisha ar ôl treth yw £140 - nid oes ganddi incwm arall.

Mae gan Alisha £2,600 o gynilion, ac mae hi wedi’u cael dros y 6 mis diwethaf. £2,600 wedi’i rannu â 52 yw £50. Mae hyn yn cael ei ychwanegu at ei hincwm.

Mae £140 a £50 yn £190. Cyfanswm incwm wythnosol Alisha yw £190. Mae hyn yn fwy nag y mae’r llywodraeth yn dweud bod ei angen arni, felly gall Alisha noddi ei phlentyn.

Os nad yw cyfanswm eich incwm yn ddigon uchel

Pan fyddwch yn cyfrifo cyfanswm eich incwm, efallai y gallwch gynnwys budd-daliadau eraill a gewch - er enghraifft rhai rhannau o'r Credyd Cynhwysol. Mae’n dibynnu ar eich amgylchiadau.

Os oes angen help arnoch i gyfrifo a ydych chi'n bodloni'r prawf cynnal a chadw digonol, siaradwch â chynghorydd.

Gwnewch yn siŵr bod lle rydych chi’n byw yn ddiogel ac yn addas

Bydd yn rhaid i chi ddangos bod lle rydych chi’n byw yn ddiogel, yn addas ac yn ddigon mawr ar gyfer nifer y bobl rydych chi eisiau byw yno gyda chi. Does dim angen i chi fod yn berchen ar eich cartref eich hun ond mae angen rhywle lle gallwch chi aros yn y tymor hir. Er enghraifft, efallai fod gennych gytundeb tenantiaeth neu ystafell eich hun yn nhŷ eich rhieni.

Os ydych yn byw mewn tŷ cyngor neu os yw eich landlord yn gymdeithas dai, gallwch weld faint o bobl sy'n cael byw yn eich cartref. Gelwir hyn yn ‘nifer y bobl a ganiateir’ (PNP). Fel arfer, mae'r PNP ar eich cytundeb tenantiaeth, neu gallwch ofyn i'ch landlord. Nid yw plant dan flwydd oed yn cael eu cynnwys yn y cyfanswm, ac mae plant rhwng 1 a 10 oed yn cyfrif fel hanner person.

Os nad yw eich landlord yn gyngor neu'n gymdeithas dai, edrychwch ar ganllawiau eich cyngor lleol am orlenwi. Gallwch ddod o hyd i’ch cyngor lleol ar GOV.UK.

Os nad yw eich plentyn yn bodloni'r rheolau ar gyfer gwneud cais am ganiatâd amhenodol

Efallai y bydd eich plentyn yn dal i allu cael caniatâd amhenodol. Mae’r rheolau’n dibynnu ar a yw'n byw yn y DU neu’r tu allan pan fydd yn gwneud cais.

Os yw eich plentyn y tu allan i’r DU

Efallai y bydd eich plentyn yn gallu cael fisa petai gwrthod y fisa yn arwain at 'ganlyniadau llym ac afresymol'. Gallai hyn fod yn wir petaech yn cael trafferth byw gyda'ch plentyn yn unrhyw le arall yn y byd - er enghraifft os oes gennych blant eraill nad ydynt yn gallu mynd gyda chi.

Gofynnwch am help gan gynghorydd arbenigol os ydych chi am wneud cais ar sail canlyniadau llym ac afresymol.

Os yw eich plentyn yn y DU

Mae’r rheolau’n gymhleth. Gofynnwch am help gan gynghorydd arbenigol.

Gweld beth yw hawliau eich plentyn os bydd yn cael caniatâd amhenodol

Os bydd eich plentyn yn cael caniatâd amhenodol, mae hyn yn rhoi bron yr un hawliau iddo ag sydd gan ddinesydd Prydeinig, gan gynnwys yr hawliau i’r canlynol:

• gweithio neu astudio

• rhentu neu brynu rhywle i fyw - gan gynnwys gwneud cais am dŷ cyngor

• hawlio budd-daliadau

• defnyddio’r GIG

• mynd i'r ysgol

• gadael y DU a dychwelyd cynifer o weithiau ag y dymunant

Fel arfer, dim ond os yw’r tu allan i'r ardal deithio gyffredin am fwy na 2 flynedd yn olynol y bydd yn colli ei ganiatâd amhenodol. Yr ardal deithio gyffredin yw’r DU, Iwerddon, Guernsey, Jersey ac Ynys Manaw.

Gwneud cais am ganiatâd amhenodol

Gweld sut y gall eich plentyn wneud cais am ganiatâd amhenodol.