Rydych chi wedi rhoi datganiad tyst i’r heddlu

Bydd yr heddlu yn gofyn i chi egluro beth welsoch chi, naill ai yn ysgrifenedig neu ar fideo – dyma’ch datganiad tyst. Byddant yn gofyn i chi ei lofnodi i ddweud ei fod yn wir.

Bydd pobl sy’n rhan o’r achos – er enghraifft, cyfreithwyr neu’r barnwr, yn darllen neu wylio’ch datganiad tyst. Efallai y byddant yn defnyddio’r dystiolaeth yn y llys hefyd.

Bydd y swyddog heddlu a fydd yn cymryd eich datganiad yn rhoi enw a manylion cyswllt y swyddog sy’n gyfrifol am yr achos - gallwch gysylltu â nhw ar unrhyw adeg os oes gennych chi unrhyw gwestiynau.

Gofalwch eich bod yn dweud wrth y swyddog heddlu sy’n cymryd eich datganiad a oes unrhyw ddyddiadau na allwch chi fynd i’r llys i roi tystiolaeth – er enghraifft, os ydych chi’n mynd ar wyliau.

Bydd yr heddlu’n cysylltu â chi os ydyn nhw angen eich cymorth eto – er enghraifft, os ydyn nhw am i chi adnabod rhywun dan amheuaeth.

Beth sy’n digwydd nesaf

Byddant yn cysylltu â chi os oes rhaid i chi fynd i’r llys i roi tystiolaeth - gall hyn gymryd cryn amser, a hynny am ei bod hi’n gallu cymryd amser hir i baratoi achos.

Os ydych chi’n dioddef trosedd

Bydd rhywun yn cysylltu â chi:

• os yw’r heddlu yn cyhuddo rhywun

• os na fydd yr achos yn mynd rhagddo – er enghraifft am nad oes digon o dystiolaeth

• os yw rhywun dan amheuaeth yn cael mechnïaeth – mae hyn yn golygu na fyddant yn cael eu cadw yn y ddalfa gan yr heddlu cyn yr achos

Dod o hyd i gymorth a chefnogaeth os ydych chi'n dioddef trosedd ar GOV.UK.

Sut mae newid neu dynnu eich datganiad yn ôl

Dywedwch wrth y swyddog heddlu sy’n gyfrifol am yr achos cyn gynted â phosibl.

Mae'n debyg y bydd yr heddlu am i chi roi tystiolaeth yn y llys i helpu i setlo'r achos. Peidiwch â theimlo dan bwysau i wneud unrhyw beth nad ydych chi eisiau ei wneud - dylech chi wneud yr hyn sy'n teimlo'n iawn.

Os ydych chi’n tynnu eich datganiad yn ôl, efallai y bydd yr achos yn dal i fynd i’r llys os yw’r heddlu yn credu bod ganddynt ddigon o dystiolaeth i erlyn y sawl sydd dan amheuaeth.

Os ydych chi am dynnu eich datganiad yn ôl am eich bod chi’n poeni am roi tystiolaeth, dylech ddweud wrth yr heddlu sut rydych chi’n teimlo. Efallai y gallwch gael cymorth ychwanegol yn y llys - gwirio a allwch chi gael cymorth ychwanegol.

Os ydych chi’n poeni am fynd i’r llys fel tyst

Gallwch gael cymorth cyfrinachol yn rhad ac am ddim gan y Gwasanaeth Tystion. Gallant roi cymorth emosiynol i chi a'ch helpu i ddeall proses y llys. Gallwch gael rhagor o wybodaeth am y Gwasanaeth Tystion a sut i gael cymorth.

Os nad ydych eisiau fynd i’r llys

Dylech siarad â'r person a ofynnodd i chi fynd i'r llys a dweud wrthyn nhw sut rydych chi'n teimlo. Mae’n bosibl bod pethau y gallant eu gwneud i’w gwneud yn haws mynd i’r llys.

Efallai y bydd yn rhaid i chi fynd i’r llys o hyd, hyd yn oed os nad ydych chi eisiau gwneud hynny – bydd yn dibynnu ar ba mor bwysig yw eich tystiolaeth i’r treial.

Os oes rhaid i chi fynd i'r llys, efallai y bydd y llys yn anfon gwŷs tyst atoch. Os byddwch yn cael gwŷs tyst, mae'n rhaid i chi fynd i'r llys pan fydd y wŷs yn dweud wrthych am wneud hynny. Gallwch ddarganfod beth fydd yn digwydd os cewch wŷs tyst.

Os nad ydych am fynd i’r llys oherwydd bod rhywun yn eich bygwth, dylech gael help. Gallwch chi ddarganfod beth i'w wneud os ydych chi'n cael eich bygwth.

Helpwch ni i wella ein cyngor ar fynd i'r llys. Dywedwch wrthym sut y gallwn wella ein gwefan yn yr arolwg 3 munud hwn.