Cael Taliad Annibyniaeth Personol (PIP) ar ôl cyrraedd oed Pensiwn y Wladwriaeth

Os ydych eisoes yn cael PIP, bydd yn parhau pan fyddwch yn cyrraedd oed Pensiwn y Wladwriaeth. Gallwch wirio eich oedran Pensiwn y Wladwriaeth ar GOV.UK.

Ni all y rhan fwyaf o bobl wneud cais newydd am PIP ar ôl iddynt gyrraedd oed Pensiwn y Wladwriaeth. Efallai y gallwch wneud hawliad newydd:

• os daeth eich PIP i ben yn y flwyddyn ddiwethaf

• os ydych chi'n cael Lwfans Byw i'r Anabl (DLA) - neu os daeth i ben yn y flwyddyn ddiwethaf

Ni allwch hawlio PIP os cawsoch eich geni cyn 9 Ebrill 1948.

Os na allwch hawlio PIP, efallai y gallwch gael Lwfans Gweini yn lle hynny - gwiriwch a allwch hawlio'r Lwfans Gweini.

Os bydd eich cyflwr yn gwaethygu tra'ch bod yn cael PIP ar ôl oedran Pensiwn y Wladwriaeth, mae rheolau ychwanegol ynghylch cael mwy o PIP.

Gwiriwch a allwch chi gael budd-daliadau arall

Efallai y byddai'n werth gwneud cais am fudd-daliadau fel Credyd Pensiwn - neu Gredyd Cynhwysol os ydych chi'n byw gyda phartner o dan oedran Pensiwn y Wladwriaeth. 

Os ydych yn cael Credyd Pensiwn neu Gredyd Cynhwysol, gallwch gael cymorth ychwanegol gyda chostau byw - er enghraifft Taliadau Tanwydd Gaeaf. Gallwch:

• wirio a allwch chi gael Credyd Pensiwn

• wirio a allwch chi gael Credyd Cynhwysol

Gwneud hawliad PIP newydd os daeth eich dyfarniad i ben yn y flwyddyn ddiwethaf

Efallai y gallwch wneud cais newydd am PIP os daeth eich hawliad PIP diwethaf i ben lai na blwyddyn yn ôl.

Dim ond os yw'r canlynol yn berthnasol y gallwch chi hawlio PIP ar gyfer cyflwr meddygol:

• gwnaethoch hawlio am yr un cyflwr fel rhan o'ch hawliad PIP diwethaf

• datblygodd o gyflwr roeddech chi wedi’i hawlio ar ei gyfer fel rhan o’ch hawliad PIP diwethaf

Er enghraifft, os oedd eich hawliad diwethaf ar gyfer diabetes a bod eich diabetes bellach wedi'i gwneud yn anoddach i chi weld, gallwch hawlio PIP ar gyfer eich diabetes a'ch colli golwg.

Gwiriwch sut i hawlio PIP.

Gwiriwch y rheolau ychwanegol ynghylch faint o PIP y gallwch chi ei gael

Os ydych yn hawlio PIP ar ôl oedran Pensiwn y Wladwriaeth, mae rheolau ychwanegol ynghylch yr 'elfen symudedd'. Mae’r elfen symudedd ar gyfer y cymorth ychwanegol sydd ei angen arnoch i symud o gwmpas.

Allwch chi ddim:

• dechrau cael yr elfen symudedd, oni bai eich bod wedi'i chael yn eich cais PIP diwethaf

• cael cyfradd uwch yr elfen symudedd os mai dim ond y gyfradd safonol a gawsoch yn eich hawliad PIP diwethaf

Mae’r rheolau hyn yn berthnasol hyd yn oed os yw eich cyflwr meddygol wedi gwaethygu.

Rhagor o wybodaeth am elfennau’r PIP a faint y gallwch ei gael.

Gwneud hawliad PIP newydd os ydych chi wedi bod yn cael Lwfans Byw i'r Anabl (DLA)

Gallwch hawlio PIP os yw’r ddau beth canlynol yn berthnasol:

• cawsoch eich geni ar 9 Ebrill 1948 neu ar ôl hynny

• rydych chi'n cael DLA nawr - neu daeth eich hawliad diwethaf am DLA i ben lai na blwyddyn yn ôl

Pan fyddwch yn hawlio PIP am y tro cyntaf, nid oes unrhyw gyfyngiadau ychwanegol ar yr hyn y gallwch hawlio amdano na faint y gallwch ei gael.

Gwiriwch y rheolau ynghylch symud o DLA i PIP.

Cael mwy o PIP os bydd eich cyflwr yn gwaethygu

Os ydych yn cael PIP ar ôl oedran Pensiwn y Wladwriaeth, mae rheolau ychwanegol ynghylch yr 'elfen symudedd'. Mae’r elfen symudedd ar gyfer y cymorth ychwanegol sydd ei angen arnoch i symud o gwmpas.

Allwch chi ddim:

• dechrau cael yr elfen symudedd, os nad ydych eisoes yn ei chael

• symud o gyfradd safonol yr elfen symudedd i'r gyfradd uwch

Mae’r rheolau hyn yn berthnasol hyd yn oed os yw eich cyflwr meddygol wedi gwaethygu.

Rhagor o wybodaeth am elfennau'r PIP a faint y gallwch ei gael.

Gwiriwch i weld am ba hyd y bydd eich dyfarniad PIP yn para

Os ydych yn hawlio PIP ar ôl oedran Pensiwn y Wladwriaeth, bydd y DWP fel arfer yn rhoi 'dyfarniad amhenodol' i chi. Mae hyn yn golygu nad oes dyddiad gorffen. Byddant fel arfer yn adolygu’r dyfarniad bob 10 mlynedd.

Os ydych eisoes yn cael PIP pan fyddwch yn cyrraedd oedran Pensiwn y Wladwriaeth, bydd y DWP yn ei droi'n ddyfarniad amhenodol.